Духовная грамота Григория Львова

Список конца XV — начала XVI в. Около 1470-х гг.

Во имя отца и сына и святого духа. Си яз, раб божии Григореи Львов, пишу грамоту душьвную своим целым умом, у кого ми што взяти, кому ми што дати.

Дати мне Подполку два рубля коновых денег; дати ми тому жо Подполку Оньдрею рубль, а в том рубле шкабалил есми пожню в болоте за росты косити; дати ми сестре Маланье двацать алътын; дати ми Мине пол­тина; дати ми Фатьяну полтина; дати ми Першаку да брату его Ивашку три четверти; дати ми Назарью Дмитрееву сыну полтора рубля; дати ми Данилку Пивже рубль.

А бласловил есми свою жену Соломею да свои де­ти: своего сына Ивана, да Захарью, да Игнатья, да, Офонасья, да Тимофея, да Оньдрея, да дочерь своею Овдотью, да Домну, да Ульяну своими землями и своими людми: деревнею Людкиным, да деревнею Възъгровым, да деревня Давыдцово, да деревня Плоское, да починок Краснаселъка, да пустошь Олексеицево.

А бласловил есми свою жену и свои дети своим человеком Сташком, да Денеском Обакуновым сыном; да свою жонжу Фетиньицу.

А што есми бласловил свою жену и свои дети теми землями, а завод тем землям по старой завод, куда то­пор ходил и коса ходила.

А приказал есми свою жену и свои дети брату сво­ему Ивану Долматову.

А на то послуси: Иван Микифоров, да Назареи Копилов, да Василеи Исаков, да Ондреи Пурнов.

А писал духовную отце мои духовной игумен Марьтемьян.

А си запечатал игумен своею печатью крестом перемонатеиным. Игумен Марьтемьян.

Акты социально-экономической истории Северо-Восточной Руси, т. 1, № 472.